ЯҢАЛЫКЛАР

26  ноябрь көнне Саба район китапханәсендә “Сөембикә”, “Алтын куллар” клуб берләшмәләре өчен, иң якты, иң күркәм бәйрәмнәрнең берсе - Әниләр атналыгы уңаеннан, “Әсәрләрдә Ана образы!” дип исемләнгән әдәби котлау кичәсе үткәрелде. Чара “Әнкәйләргә якты йолдызлардан, я кояштан һәйкәл куярлык...” дип исемләнгән күргәзмә янында, табышмак-уен формасында үтте. Китапханәчеләр татар язучыларының әниләргә багышланган әсәрләреннән өзекләр укыдылар, ә тамашачыларыбыз язучыларны танып белделәр. Бәйрәм кичәсе һәр кешенең күңеленә хуш килде.

Еш кына тышкы яктан матур кеше үзен тупас, әдәпсез тота. Андый кеше беркемгә дә шатлык китерми. Һәм киресенчә, бик матур булмаса да, бик игелекле, намуслы кешеләр бар. Һәм безнең алар белән дус буласыбыз һәм аларга охшыйсыбыз килә. Без дә игелекле һәм әдәпле кешеләр булырга тырышабыз.

2024 елның 25 ноябрендә Шәмәрдән авыл китапханәсендә «Балкыш» тернәкләндерү үзәгендә ял итүчеләр өчен «Кешеләргә яхшылык бүләк ит»дигән әдәплелек дәресе үткәрелде.

     Чарада катнашучылар «Әдәпле викторина» да катнаштылар, әдәби геройларны таныдылар, тематик уеннар уйнадылар.

     Һәркем бер хакыйкатьне исенә төшерде: һәркемдә булырга тиешле яхшылык бар – яхшы йөрәк, яхшы күңел, яхшы сүзләр.

Чара «Яхшылык эшлә!» видеоролигын карау белән тәмамланды.

Явлаштау авыл китапханәсе һәм мәдәният йорты хезмәткәрләре татар язучысы һәм драматургы Шәриф Хөсәеновка 95 яшь тулу уңаеннан «Дөньяда сүзем калыр» исемле әдәби кичә үткәрделәр. Чара кысаларында катнашучылар язучының биографиясе, аның иҗади юлы һәм татар әдәбиятындагы әһәмияте белән таныштылар.

Пьесалардан өзекләр укуга аерым игътибар бирелде, бу исә аның иҗаты рухына тирәнрәк үтеп керергә мөмкинлек бирде. Кичәдә катнашучыларга шулай ук "Әниемнең ак күлмәге" драмасыннан өзек тәкъдим ителде, ул Шәриф Хөсәеновның тирән хисләрне әдәби образлар аша җиткерү осталыгына ачык мисал булды.

Рәсем ясау кешенең фантазиясен үстерә, баш миен ял иттерә, күңелне тынычландыра, кәефне күтәрә -дип саный белгечләр. 26 ноябрь көнне Саба район балалар китапханәсе Саба урта мәктәбенең китапханәсе белән берлектә «Рәссамнар дөньясы» дип исемләнгән  сәнгать сәгате үткәрде. Китапханәчеләр укучыларны татар сынлы сәнгатенең үз гомерләрен рәсем сәнгатенә багышлаган күренекле рәссамнар: Б. Урманчы, И. Зарипов, Л. Фәттәхов, Ш. Шәйдуллин, Х. Якуповның иҗатлары белән таныштырдылар. Рәсем ясауның төрле ысуллары, аның төрләре турында яңа мәгълүматләр алдылар.Әлеге чара татар рәсем сәнгатенең бай дөньясын һәм халыкның мәдәни мирасын тирәнтен аңларга мөмкинлек бирде.

Явлаштау китапханәсе һәм мәдәният йорты хезмәткәрләре сүзлекләр һәм энциклопедияләр көненә багышланган «Сүзләр дөньясы» дигән мәгълүмати әңгәмә үткәрделәр. Чарада катнашучылар сүзлекләрнең һәм энциклопедияләрнең тормышыбыздагы әһәмияте, аларның мәгарифтәге һәм мәдәнияттәге роле турында фикер алыштылар, шулай ук үзләренең яраткан сүзлек басмалары белән уртаклаштылар.

Катнашучылар тел һәм сүзлекләр белән бәйле кызыклы фактлар белән таныштылар, мәкаль һәм әйтемнәрне дәвам иттеләр.

Ел саен бөтен дөньяда ноябрьнең соңгы якшәмбесендә искиткеч бәйрәм-Әниләр көне билгеләп үтелә! Әниләр көне-күңелне нечкәртә торган бәйрәм, ул  безнең һәрберебезнең тормышында иң мөһим кеше – әни икәнен искә төшерә. 22 ноябрь көнне Кызыл Мишә мәдәният йортында, мәдәният йорты  һәм китапханә хезмәткәрләре " Һәрвакыт булсын әни!»дигән ял кичәсе оештырдылар. Бәйрәм чарасында Тимершык мәдәният йортының сәнгать җитәкчесе дә катнашты. Барлык концерт номерлары мәхәббәт һәм хөрмәт хисләре белән башкарылды.  Әниләргә җылы сүзләр, изге теләкләр, күңелгә үтеп керерлек шигырьләр, лирик һәм күңелле җырлар яңгырады.

   Кичәне әниләр катнашында «Безнең уен» интеллектуаль уены белән дәвам иттеләр. Уен җылы һәм дустанә атмосферада узды. Әниләр "Ханымнар" һәм "Супер әниләр"командаларына бүленде. Уен берничә турдан торды. Сорауларга җавап биргәндә, анда катнашучылар үзләренең эрудицияләрен һәм логик фикерләүләрен, вакыт чикләнгән шартларда стандарт булмаган ситуациядә карарлар кабул итә белүләрен күрсәтергә тиеш булдылар. Барлык сораулар да катнашучылар өчен кызыклы һәм мавыктыргыч булды. Жюри фикеренчә, әниләр биремнәрне уңышлы үтәделәр һәм дуслык җиңде. Чара ахырында барлык катнашучыларга да истәлекле бүләкләр тапшырылды. Кичәдән һәркем дә кәнәгать калды.

2024 елда «Дәрдмәнд» псевдонимы белән танылган күренекле татар шагыйре Рәмиев Закир Садыйк улының тууына 165 ел тула. Бу көнгә Шәмәрдән авыл китапханәсендә «Дәрдемәнд иҗаты» дигән китап күргәзмәсе әзерләнде, анда аның әсәрләре һәм әдәбияты күрсәтелде.

Әниләр көне якынлаша - Россиядә ул ноябрьнең соңгы якшәмбесендә билгеләп үтелә. Бу көнне һәр бала үз әнисен сөендерергә һәм аның өчен ниндидер кул эшләре эшләргә омтыла. Бүләкләр турында уйланыр вакыт җитте. Иң кадерле  бүләк ул - балаңның үз куллары белән ясаган бүләге!                                               22 нче ноябрь көнне  укытучылар Хафизова Ч.Ф. һәм Зәйнетдинова З.З. «Әни өчен открытка» ясау буенча мастер-класс үткәрделәр.   Әлеге чарада укучылар укытучылар ярдәмендә төсле кәгазь һәм картоннан үзенчәлекле открыткалар әзерләделәр.

Әзер открыткаларны үзләренең  изге теләкләре белән имзаладылар.

Саба туган якны өйрәнү музее хезмәткәрләре агач эшләнмәләрне буяу буенча мастер-класс үткәрделәр. Укучылар күрсәтелгән үрнәкләрне зур кызыксыну белән карадылар, агач эшләнмәләрне буяу ысуллары белән таныштылар. Балалар мастер-класста бик теләп катнаштылар, бәйрәм көн уңаеннан бу хезмәтләре әниләрен сөендерергә бик матур бүләк булды.

Сатыш авылы мәдрәсә музеенда авыл хуҗалыгы министрлыгы аша квалификация күтәрү курслары узучы авыл хуҗалыгы белгечләре булды.