ЯҢАЛЫКЛАР

Түбән Шытсу төп мәктәбендә Гаилә елы ачылышына багышланган чара булып үтте. Әлеге чарада гаиләләр катнашты. Алар кызыклы сорауларга җаваплар эзләделәр, уеннар уйнадылар. Бәйрәм ахырында барлык катнашучылар истәлек бүләкләренә ия булдылар.

29 январь көнне Түбән Шытсу мәдәният йортында гражданнар җыены булып үтте. Җыенда Саба муниципаль районы башлыгы урынбасары Закирзянов Р.Р. һәм төрле оешма, учрежденияләрнең җитәкчеләре катнашты. Җыен барышында отчет чыгышлары тыңланды һәм 2024 елга планнар куелды. 

Түбән Шытсу авыл җирлегендә урамнарны кардан чистарту эше вакытында башкарыла. Күп кар яву нәтиҗәсендә урамнар тараеп калды, бүген әлеге мәсьәләне хәл итү максатыннан, "СХП Шытсу" ҖЧҖ тарафыннан өстәмә техника куелды һәм урамнар киң итеп чистратылды. Авыл хуҗалыгы җәмгыятенә рәхмәт белдерәбез.

Югары Шытсу авылы халкы ярдәме белән гуманитар ярдәмнең чираттагысы тапшырылды. 

Югары Шытсу мәдәният йортында "Үкенерлек түгел үткәннәр" исеме астында бәйрәм чарасы үткәрелде. Әлеге бәйрәм, агымдагы елда үзләренең 50 яшьлек юбилейларын билгеләп үтүчеләргә багышланды. Юбилярлар үзләре белән якыннан таныштырдылар, кызыклы вакыйгаларны искә төшерделәр. Әлеге бәйрәм чарасы концерт номерлары, котлаулар белән үрелеп алып барылды.  

Елыш авыл клубында Искечә Яңа елны каршылауга багышланган бәйрәм чарасы булып үтте. Бәйрәмдә җырлы-биюле тамаша, кызыклы уеннар тәкъдим ителде.

Югары Шытсу авылы халкы тырышлыгы белән мобилизациядә булган егетләргә гуманитар ярдәм эше актив алып барыла. Кием-салым, җылы носкилар бәйләнде, азык-төлек җыйналды. Барлык булышлык  күрсәтүчеләргә зур рәхмәт. Ярдәм итү эше алга таба дәвам ителә. Шушы көннәрдә "Солдатка өйдәге аш" акциясен башлап җибәрүчеләрнең берсе Гүзәл Садыкова белән очрашу булды. Очрашуда әлеге акциянең барлык нечкәлекләре аңлатылды. Әлеге юнәлеш буенча да ярдәм эше башланып китте.

Югары Шытсу авылында итекле футбол ярышы булып үтте. Ярыш нәтиҗәләре буенча беренчелекне "Саба" командасы яулады, икенче һәм өченче урыннарны "Шытсу-1", "Шытсу -2" командалары бүлеште. Җиңүче һәм призерлар акчалата бүләккә ия булдылар.

Елыш авыл клубында балалар өчен Яңа ел чыршысы узды. Матур бизәлгән чыршы, искиткеч костюмнар, бүләкләр, Кыш Бабай, Кар кызы һәм башка бик күп әкият персонажлары балаларны көтте. Ялтырап торган төрле-төрле гирляндалар һәм бик матур итеп бизәлгән чыршылар балаларга могҗиза хисе китерделәр.

Түбән Шытсу авыл җирлеге депутатлары Флорид Гайнуллин, Ильнар Набиуллин һәм шәхси эшмәкәр Марат Насибуллиннар ярдәме белән мобилизацияләнгән егетләрнең балаларына яңа ел күчтәнәчләре тапшырылды. Әлеге күчтәнәчләргә барлыгы сигез бала ия булды. Ярдәмнәре өчен иганәчеләргә рәхмәт белдерәбез.