ЯҢАЛЫКЛАР
Балалар техник иҗатына ярдәм итү һәм үстерү буенча район фестивалендә 2024-2025 уку елы нәтиҗәләре буенча укучыларга өстәмә белем бирү, спорт, иҗат һәм техника дөньясына тартуда, балаларның шәхси мөмкинлекләрен үстерүдә нәтиҗәле эшчәнлеге өчен Олы Шыңар урта мәктәбе судомоделләштерү берләшмәсе җитәкчесе Мөхетдинов Фәнзир Якуб улы, ярышларда катнашучы , Мөхетдинов Айзат, Мубараков Самат, Тимергалиев Зиннур Саба муниципаль районы башлыгының Рәхмәт сүзенә лаек булдылар.
2025нче елның 23нче маенда Гайнанов Хәбир Гайнан улына 90 яшь тулды. Саба муниципаль районы башлыгы Р.Н.Миңнеханов исеменнән котлау һәм истәлекле бүләкләрне Саба муниципаль районы социаль яклау бүлеге башлыгы Гайнетдинова Л.Н. тапшырды. Котлауларга шулай ук Олы Шыңар авыл җирлеге башлыгы Гарипов А.Г. һәм “Туган Як” җәмгыяте вәкилләре дә кушылды.
Май бәйрәмнәре вакытында Олы Шыңар авыл җирлеге биләмәсендәге Оет авыл зиратында чистарту буенча өмә үткәрелде. Авылда яшәүчеләр дә, кайткан кунаклар да актив катнашты.
Бөек Җиңүнең 80 еллыгы уңаеннан Олы Шыңар авыл җирлегендә тыл ветераннарына Саба муниципаль районы башлыгы исеменнән котлау открыткалары һәм бүләкләр тапшырылды.
8 май көнне Олы Шыңар авыл җирлегендә Олы Шыңар һәм Оет авылларында Бөек Ватан сугышында Җиңү көненә багышланган чаралар үткәрелде. Һәлак булган сугышчылар истәлегенә төзелгән һәйкәл янында «Сугыш геройларына багышлана»дип исемләнгән тантаналы митинг узды. Олы Шыңар авыл җирлеге башлыгы Гарипов А.Г., Саба районы җир һәм милек мөнәсәбәтләре палатасы рәисе Галиуллин А.М.; Олы Шыңар урта мәктәбе директоры Мубараков Р.Г.; “Туган Як” җәмгыяте директоры Саубанов Ф.К.; ветераннар Советы рәисе Гарипов А.М. халыкка сәламләү сүзе белән мөрәҗәгать иттеләр. Һәлак булучылар бер минут тынлык белән искә алынды һәм һәйкәлләргә чәчәкләр куелды. Митингтан соң мәдәният йортында һәм авыл клубында бәйрәм концертлары булды. Бәйрәм атмосферасында сугыш һәм халык җырлары, сугыш турында шигырьләр яңгырады, мәдәният йорты һәм урта мәктәп иҗат коллективлары чыгыш ясады.
26 апрель көнне радиация һәлакәтләре бәла-казалары корбаннарын искә алу көне уңаеннан Кече Шыңар мәдәният йорты, Олы Шыңар авыл җирлеге хезмәткәрләре һәм мәктәп укучылары белән берлектә Олы Шыңар авылында гомер итүче, “Маяк” станциясен зарарсызландыруда катнашкан Ахунҗанов Әдһәм абыйның өенә бардылар, аның хәлләрен белешеп, күчтәнәч – бүләкләр тапшырдылар. Балалар Әдһәм абый сөйләгәннәрне игътибар белән тыңладылар, үзләренең җыр, шигырь, биюләрен бүләк иттеләр. Шулай ук “Маяк” зонасында катнашкан Сафин Гыйлметдин абыйның ( үзе вафат) хатыны Наилә апа янына барып, бүләкләр тапшырдылар.
2025нче елның 26нчы апрелендә Сафина Наилә Габдулла кызына 90 яшь тулды. Саба муниципаль районы башлыгы Р.Н.Миңнеханов исеменнән котлау һәм истәлекле бүләкләрне Саба муниципаль районы социаль яклау бүлеге башлыгы Гайнетдинова Л.Н. тапшырды. Котлауларга шулай ук Олы Шыңар авыл җирлеге башлыгы Гарипов А.Г. һәм “Туган Як” җәмгыяте вәкилләре дә кушылды.
Олы Шыңар урта мәктәбе укучысы Мөхетдинов Айзат Мәскәүнең «Станкин» дәүләт технология университеты үткәргән «Яшь техник-модельләштерү» башлангыч техник модельләштерү һәм конструкцияләү Бөтенроссия конкурсының республика этабында җиңгәннән соң , Мәскәүдә әлеге конкурсның финал этабында катнашты. Айзат лаеклы чыгыш ясап, үз эшен яклады һәм 3 нче дәрәҗә лауреат дипломы белән бүләкләнде. Шулай ук диплом белән аның җитәкчесе Ф. Я. Мөхетдинов та бүләкләнде.
Олы Шыңар авылында Бөек Ватан сугышында һәлак булган сугышчылар истәлегенә төзелгән һәйкәл тирәлегендә төзекләндерү эшләре башкарылды. Һәйкәл каршындагы мәйданчыкка ком салынды һәм өстенә вак таш түшәлде. Бу эшне Туган Як җәмгыяте башкарды. Шулай ук һәйкәлне әйләндереп алган коймалар буялды.
Олы Шыңар авыл җирлегендә тыл ветераннарын якынлашып килүче Җиңү көне белән котладылар. Аларга Татарстан Республикасы Рәисе һәм Саба муниципаль районы башлыгы исеменнән котлау открыткалары һәм бүләкләр тапшырылды.