ЯҢАЛЫКЛАР
Олы Шыңар авыл җирлегендә үзара салым акчасына Олы Шыңар авылында балалар мәйданчыгы урнаштырылды. Эшләрне «БарсЭлитСтрой» ААҖ башкарды.
Олы Шыңар авылында яшәүче Әхмәтов Рафаил Әхмәт улы һәм Әхмәтова Гөлнур Фәйзрахман кызының бергә яшәүләренә 50 ел тулды. Әхмәтов Рафаил Әхмәт улы –1949нчы елның 20нче августында туган, Әхмәтова Гөлнур Фәйзрахман кызы – 1947нче елның 26нчы сентябрендә туган.
Олы Шыңар авылында яшәүче Гыйлметдинов Роберт Ким улы һәм Гыйлметдинова Рәзифә Зиннәт кызының бергә яшәүләренә 50 ел тулды.
Гыйлметдинов Роберт Ким улы – 1948нче елның 10нчы февралендә туган Гыйлметдинова Рәзифә Зиннәт кызы – 1948нче елның 28нче гыйнварында туган.
Олы Шыңар авыл җирлеге биләмәсендә чистарту, төзекләндерү эшләре даими алып барыла. Олы Шыңар һәм Кече Шыңар авыллары тирәсе куаклыклардан чистартылды, ташу сулары агызыр өчен канаулар казылды.
Олы Шыңар авылында яшәүче Шагиева Асия Галимулла кызына 2022нче елның 15нче сентябрендә 95 яшь тулды. Россия Президенты В.В.Путин һәм Саба муниципаль районы башлыгы Р.Н.Миңнеханов исеменнән котлау һәм истәлекле бүләкләрне Саба муниципаль районындагы социаль яклау бүлеге башлыгы Гайнетдинова Л.Н. тапшырды. Котлауларга шулай ук Олы Шыңар авыл җирлеге башлыгы А.Г.Гарипов кушылды.
Асия апаның 42 ел эш стажы бар, шуның 7 елы – колхозда. Бүгенге көндә кызы Гөлүсә исән – сау, 3 малае инде вафат, 8 оныгы, 13 оныкчыгы бар. Олы Шыңар авылында кызы Гөлүсә тәрбиясендә яши.
“Бөек Ватан сугышы” елларында тылдагы хезмәтләрен бәяләп “Фидакарь хезмәт өчен” медале, Бөек Җиңүнең юбилей медальләре бирелә.
Август аеның матур бер көнендә Шыңар авылыннан чыккан көрәшчеләр бергә җыйналдылар. Өлкәннәр элеккеге вакытларны искә алып, яшь көрәшчеләргә киңәшләрен бирделәр. Безнең Шыңардан гына татарча көрәш буенча Россиянең спорт мастеры исеменә 5, Татарстанның спорт мастеры исеменә 12 кеше лаек булды.
27август көнне Олы Шыңар авылы спорт мәйданчыгында авыл командалары арасында мини- футбол буенча ярышлар оештырды. Барлыгы 6 команда катнашты: Теләче районыннан Кибәхуҗа, Казаклар, Иске Җөри, Саба районыннан Саба, Шыңар, Тимершык авылы командалары.
Олы Шыңар авыл җирлегендә үзара салым акчасына Оет авылы зиратында хуҗалык кирәк-яраклары өчен корылма эшләнә. Эшләрне Саба ПМК «Мелиорация” ҖЧҖ башкара.
Олы Шыңар авыл җирлегенә караган торак пунктларда халыктан җыйналган үзара салым хисабына авыл юлларын ремонтлау эшләре төгәлләнде. Кече Шыңар авылында Комсомол урамының 168 м өлеше, Олы Шыңар авылында Такташ урамының 187м, Оет авылында Кооператив урамының 97 м өлеше ремонтланды. Юл ремонтлау эшләрен «Рамазан» ААҖ оешмасы башкарды.
Кече Шыңар мәдәният йорты һәм китапханә хезмәткәрләре "Җыр-биюле кичке уеннарга, болыннарга кайтам чор аша" проекты кысаларында Олы Шыңар авылында кичке уен оештырдылар. Аның максаты-халык традицияләрен саклау һәм дәвам итү. Кичке уеннар-бик күп кешеләрнең исләрендә онытылмаслык һәм якты вакыйга булып саклана.