ЯҢАЛЫКЛАР

28 январь көнне Олы Кибәче авыл җирлегендә гражданнар җыелышы булып узды. Көн тәртибендә түбәндәге мәсәләләр каралды:

1. Авыл җирлеге башлыгының 2019 елда җирлек буенча эшләнгән эшләргә хисабы.

2. Алдагы елда җыелышта яңгыраган сорауларның үтәлеше, гражданнарның сораулары, тәкъдимнәре.

3. Участок вәкаләтлесе Сәхәбиев А. чыгышы.

4. Саба районы социаль яклау идарәсе җитәкчесе Хуҗин М.М.чыгышы.

5. Саба һәм Теләче районнары буенча пенсия бүлеге җитәкчесе Якупова Ф.Ш. чыгышы.

6. Саба һәм теләче районнары буенча янгын күзәтчелеге бүлеге җитәкчесе Галимуллин А.Р. чыгышы.

7. Саба муниципаль районы башлыгы Миннеханов Р.Н. йомгаклау сүзе.

2020  елда  ТАССР  оешуга 100 ел тула. 23 гыйнвар көнне Төбәк авыл клубында (күчмә китап бирү пункты)  уздырылган башваткыч  уенында  бер гасырлык тарихы булган Татарстаныбыз хакында  сөйләштек.  Китапханә мөдире Фатыхова Г. Татарстанның  төрле өлкәләрен чагылдырган сораулардан торган кроссворд әзерләгән иде. Төбәк авыл клубы мөдире Хадиуллина Г. ,авыл үзешчәннәре белән берлектә, уенны  матур җырлары белән ямьләндерде.  Клуб мөдире белән берлектә уздырылган бу чарадан  тамашачылар канәгать  калды. Башваткыч уенында катнашучыларга китапханә мөдире райондашыбыз Г.Галимуллинаның китапларын бүләк итте.

Олы Кибәче авыл җирлеге биләмәсендә, юлларны тәртиптә тоту һәм янгын куркынычсызлыгы максатыннан, җирлек юллары һәм янгын гидрантлары даими рәвештә кардан чистартылып тора.

Кече Кибәче авылында арендага йорт төзү эшләре дәвам итә. Төзелешне ПМК-159 оешмасы алып бара.

22 декабрь көнне Төбәк авылында Кыш бабай һәм Кар кызы, урман җәнлекләре белән бергәләшеп, өйдән өйгә йөреп, Төбәк авыл халкын бәйрәм белән котладылар, аларга бүләкләр өләштеләр.

Кече Кибәче авылында авыл хуҗалыгы белгечләре өчен арендага йорт төзү эшләре башланып китте. Төзелешне "ПМК-159" оешмасы башкара.

10 декабрь көнне, инвалидлар ункөнлеге кысаларында, Олы Кибәче авыл үзешчәннәре Лесхоз картлар һәм инвалидлар йортында концерт куеп кайттылар.

5 декабрь көнне Олы Кибәче авыл җирлегеннән Гүзәл Шәрәфиева, Георгий Юзеев һәм Язилә Сөнгатуллина ТНВ да "Башваткыч" тапшыруында катнашып кайттылар. Аларга көч биреп җан атып утырырга туганнары, дуслары, хезмәттәшләре барды.

29 ноябрь көнне Олы Кибәче авыл клубында Саба үзәк хастаханәсе коллективы иҗат-отчет концерты белән чыгыш ясап китте. Тамашачы һәр чыгышны көчле алкышлар белән кабул итте. Хастаханә коллективына алга таба да иҗади уңышлар телибез!

Олы Кибәче авыл җирлеге командасы мини-футбол буенча район чемпионатында катнашты һәм 4:0 исәбе белән Мамалай командасын отты. Егетләрне котлыйбыз һәм алга таба да уңышлар телибез!