ЯҢАЛЫКЛАР
Кече Кибәче авыл клубында шулай ук Яңа елга багышлап кичә уздырылды. Төрле кызыклы уеннар уйналды, әйлән-бәйлән җырланды. Бу бәйрәмнең күңелле мизгелләре күңелләрдә озак сакланыр.
Төбәк авыл клубында Яңа ел кичәсе билгеләп үтелде. Монда авыл җирлеге башлыгы А.К.Сафин махсус хәрби операция зонасында хезмәт итүче егетләрнең гаиләләренә, волонтерларга күчтәнәч пакетлар тапшырды.
30 декабрь көнне Олы Кибәче авыл клубында бал маскарад кичәсе оештырылды. Бәйрәм чарасы бик эчтәлекле һәм мавыктыргыч итеп оештырылган иде. Барлык кунаклар да бәйрәмнән бик канәгать булып һәм чын бәйрәм халәте алып таралды.
Олы Кибәче урта мәктәбендә укучылар өчен Яңа ел кичәләре билгеләп үтелде. Балалар җырладылар, биеделәр, төрле кызыклы номерлар күрсәттеләр. Елдагыча олимпиадаларның район этабында призлы урын алучы балалар бүләкләп кителде. Аларга бүләкләрнең спонсоры авылдашыбыз, эшмәкәр Рифкат Шәфыйков булды.
Һәр елны Яңа елга оешмалар үз территорияләрен төрле кар сыннары һәм утлар белән бизиләр. Быел Олы Кибәче урта мәктәбе һәм "Кубәләк" балалар бакчасы бу бәйгедә беренче урыннарны алдылар. Аларны котлыйбыз!
Олы Кибәче урта мәктәбендә, ришвәтчелеккә каршы көрәш көненә карата, "Без ришвәтчелеккә каршы" дигән темага ачык сыйныф сәгате узды.
Олы Кибәче урта мәктәбе коллективы Лесхоз картлар йортына барып, анда яшәүче абый- апаларга бик матур эчтәлекле концерт куеп кайттылар. Алар белән аралашу балалар күңелендә озак сакланыр
«Сыйныф очрашулары» Бөтенроссия проекты кысаларында, шулай ук Ватан Геройлары көне алдыннан Олы Кибәче урта мәктәбендә отставкадагы подполковник, махсус хәрби операциядә катнашкан Ф.А. Габделхаев белән сыйныф очрашуы узды. Ул «Беренчеләр хәрәкәте» ндә катнашучыларга һәм яшь армиячеләргә үзенең ни өчен хәрби һөнәр сайлавы һәм аның хезмәте ничек узуы турында сөйләде. Отставкадагы элеккеге подполковник буларак 2023 елның маенда ул СВОГА китә һәм танк батальоны командирының ярдәмчесе булып хезмәт итә. 2024 елда яраланганнан соң демобилизацияләнгән. Балалар кунакка үзләрен кызыксындырган күп кенә сораулар бирделәр. Мондый очрашулар үз илең өчен горурлык хисе тәрбияләргә ярдәм итә. Батырлык, Ватанга мәхәббәт — ул чын кешенең сыйфаты!
Олы Кибәче урта мәктәбе укучылары һәм укытучылары Волонтерлар көне уңаеннан "Изгелек эшлә" акциясенә кушылып, кулдан токмач кистеләр. Шулай ук укучылар "Билгесез солдатка" хат яздылар.
Олы Кибәче урта мәктәбендә Әниләр көненә багышлап концерт куелды. Концертта һәр укучы бик теләп үзенең иҗаттагы осталыгын күрсәтте.