ЯҢАЛЫКЛАР

Халыкара мәктәп китапханәләре көне алдыннан 1 класс укучылары мәктәп китапханәсендә булдылар. Беренче сыйныф укучылары китаплар дөньясына мавыктыргыч сәяхәт ясадылар. Китапханәдән файдалануның төп кагыйдәләре белән таныштылар, бизәлгән китап күргәзмәләренә аерым игътибар бирелде. Олы Кибәче урта мәктәбе китапханәчесе Илсөя Рамазан кызы укучыларны китапханә, якты китап күргәзмәләре, китапханәдән файдалануның төп кагыйдәләре белән таныштырды. Яшь укучылар китапның барлыкка килү тарихын белделәр, яңа сүзләр белән таныштылар: абонемент, уку залы, формуляр, стеллаж һ. б. Алар шулай ук кирәкле китапны ничек табарга икәнен белделәр, китапханә кагыйдәләре, китап белән эш итү кагыйдәләре белән таныштылар. Китапханәгә беренче тапкыр бару кызыклы, мавыктыргыч һәм белемле булды. Балалар китапханәнең даими укучылары булачагына ышанасы килә!

Олы Кибәче авыл җирлегендә "Саба" ҖЧҖ бу ялларда пай җирләре өчен халыкка ашлык бирде.

"Саба" ҖЧҖ нең Кибәче бригадасында кукурузадан мал азыгы әзерлиләр. 150 гектар кукурузадан силос салынган, 140 гектарыннан корнаж әзерләнгән, ә 120 гектарыннан чәчүлек орлыкка алырга җыеналар. 

Халыкара өлкәннәр көне ункөнлеге кысаларында, кече Кибәче авыл клубында "Ихтирамга лаек өлкәннәр" дигән чара оештырылды. Чарага килгән кунакларны авыл җирлеге башлыгы А.К.Сафин бәйрәм белән котлады. Ә кунаклар чәй табыны артында концерт карадылар.

Халыкара өлкәннәр көне ункөнлеге кысаларында, Төбәк авыл клубында "Каласы иде яшьлектә!" дип исемләнгән чара узды. Чарага авыл хуҗалыгы тармагында эшләп лаеклы ялга чыккан пенсионерлар чакырылган иде. Аларны бәйрәм белән авыл җирлеге башлыгы А.К.Сафин котлады. Ә кунаклар үз чиратында чәй табыны артында мәдәният хезмәткәрләре әзерләгән концерт карадылар.

Олы Кибәче авыл җирлегендә ике урында су торбасында авария булды. Саба күптармаклы җитештерү предприятиесе эшчеләре тиз арада эшне башкарып киттеләр.

Олы Кибәче авыл җирлеге башлыгы А.К.Сафин җирлеккә күчеп кайткан, оешмалары ябылган һәм авыл җирлеге пенсионерларын Халыкара өлкәннәр көне белән котлады һәм аларга азык-төлек пакетлары тапшырды. Шулай ук Лесхоз картлар йортында тәрбияләнүче безнең җирлек кешесе Шәймәрданов Зөфәр абый янында булып, аңа да бәйрәм күчтәнәче тапшырды.

Ел саен 1 октябрь көнне районда алтын һәм зөбәрҗәт парларны тәбрикләү тантанасы була. Быел безнең җирлектән бергә гомер итүләренең 50 еллыгын Хөснетдиновлар гаиләсе билгеләп үтә. Илсур Мансур улы һәм Дәмдәмия Гали кызы 1974 елның март аенда гаилә корып яши башлыйлар һәм 4 бала тәрбияләп үстерәләр. Алар икесе дә авыл хуҗалыгы тармагында хезмәт куйганнар. Бүген аларны шушы матур дата белән тәбрикләргә авыл җирлеге башлыгы А.К.Сафин, эш урыныннан җитәкче Р.Р. Шәймәрданов һәм шулай ук балалары, туганнары килгән иде.

Олы Кибәче авыл клубында Халыкара Өлкәннәр көненә карата "Сезнең яшегез алтынга тиң" дип исемләнгән бәйрәм чарасы оештырылды. Чарага төрле тармак пенсионерлары чакырылган иде. Аларны авыл җирлеге башлыгы А.К.Сафин, "Саба" ҖЧҖ Кибәче бригадасы җитәкчесе Р.Р. Шәймәрданов һәм шәхси эшмәкәр Р.З. Шафиков котлады.

Олы Кибәче урта мәктәбендә җирлектәге бюджет оешмаларында эшләп чыккан пенсионерлар өчен Өлкәннәр көне оештырылды. Аларны авыл җирлеге башлыгы А.К.Сафин бәйрәм белән тәбрикләде, укучылар концерт номерлары белән чыгыш ясадылар. Бәйрәм чәй табыны артында тәмамланды.