ЯҢАЛЫКЛАР

“Сафин И.Ф.” крестьян-фермер хуҗалыгында кишер уңышын алу дәвам итә.

10 сентябрьдә Юлбат мәдәният йорты, китапханә, Тенеки һәм Йосыф - Алан клублары хезмәткәрләре Казан кунаклары өчен Сафин И.Ф. музеена "Безнең район - безнең горурлыгыбыз" дип исемләнгән экскурсия оештырдылар. 

Җаваплылыгы чикләнгән Юлбат авыл хуҗалыгы басуларында көзге кыр эшләре бара. К-742 тракторында Рәхимуллин Рафил көндәлек 10-15 га җирне эшкәртә.

24 августта Юлбат авыл китапханәсе мөдире "Хәзинә" клуб берләшмәсе балалары белән бергә Саба үзәк китапханәсе оештырган "Әдәби алан" - "Ямьле җәй - китаплы җәй" проектында җиңүчеләрне бүләкләү тантанасында катнашты. Балалар өчен мастер-класслар эшләде. Анда алар шигырьләр язарга, проект турында тәэсирләре белән уртаклашырга мөмкинлек алды.

Ел саен 22 августта барлык россиялеләр Россия Федерациясе Дәүләт флагы көнен билгеләп үтәләр. Бу көнне Юлбат мәдәният йорты хезмәткәрләре «Дәүләт флагы – дан символы» дигән патриотик сәгать үткәрделәр. Чарада катнашучыларга илнең төп символлары турында сөйләделәр. Балалар викторина сорауларына җавап бирделәр һәм үзләре флаг төсләренең мәгънәләре турында сөйләделәр.

19 августта Йосыф-Алан авыл клубында, Юлбат авыл китапханәсе белән берлектә, балалар журналлары дөньясында дип аталган вакытлы матбугатка күзәтү уздырылды. Яшь укучылар китапханәгә килүче журналлар белән таныштылар. Һәр бала яраткан журналын укырга сайлап алды.

Татарстан Республикасында милли мәдәниятләр һәм гореф-гадәтләр елы кысаларында, 19 август көнне, Юлбат авыл китапханәсе, мәдәният йорты, Тенеки авыл клубы белән берлектә, авылның Тукай урамында, милли чара – Татар халкының матур традициясе югалмасын әле дип, "Кич утырыйк бергәләп" дигән кич утыру оештырдылар.  Авылның иң күркәм, матур гадәте  бит ул – кич утыру. Кич утыру кичәсен милли көйләр, уеннар, биюләр, нәфис сүзләр бизәде. Кичке уеннан соң табын янында күңелле әңгәмәләр дәвам итте.

18 августта Юлбат мәдәният йорты һәм авыл китапханәсе хезмәткәрләре авылыбызның матур урыннарында «Туган як буйлап күңелле атлыйм» дигән экологик сәяхәт үткәрделәр. Балаларны төрле агачлар, куаклар, һәм декоратив үсемлекләр белән таныштырдылар. «Яңа китап - яңа дус» дип исемләнгән китап күргәзмәсенә күзәтү һәм викторина үткәрелде.

17 августта Юлбат мәдәният йорты һәм авыл китапханәсе хезмәткәрләре «Юлбатым-Ямбулатым» дип исемләнгән туристик экскурсиясен оештырдылар. Экскурсия Г.Тукай урамында үтте. Бу маршрутта «Юлбатым — Ямбулатым» тарихи-документаль китабы авторы Сафин Илдар Фәтхулла улы белән кызыклы очрашу булды. Ул балаларга китапның барлыкка килү тарихын, авыл һәм аның халкы тарихындагы кызыклы фактлар турында сөйләде. Балаларга үз музееның тарихи экспонатларын күрсәтте. Маршруттагы чираттагы тукталыш: Чирмеш чишмәсе. Балалар Юлбат авылының беренче күченүчеләре турында белделәр, аннары Галиев Наил Тимергали улы капкасы янында тукталдылар. Ул авылдашларыбызның шәҗәрәсен төзү буенча эш алып бара, авыл тарихын яхшы белә. Экскурсия Г.Тукай урамында, яраткан шагыйребезнең шигырьләрен уку белән тәмамланды.

16 августта Юлбат мәдәният йорты һәм китапханә хезмәткәрләре «Борынгы васыятьләр» дигән фольклор сәгате үткәрделәр. Чара барышында балалар татарларның көнкүреше, музыка кораллары белән таныштылар. Мәдәният йорты һәм китапханә мөдирләре халык бәйрәмнәре, йолалары, традицияләре турында сөйләделәр.