ЯҢАЛЫКЛАР

Саба туган якны өйрәнү музеенда Халыкара укытучылар көне уңаеннан "Күкләр юлы кирәк кешегә" дип исемләнгән чара үткәрелде. Әлеге чарада Арча “Казан арты” тарих-этнография музее филиалы Мөхәммәт Мәһдиев музее мөдире Халидә Кыям кызы Габидуллина белән очрашу, М. Мәһдиевнең укытучы-остаз буларак эшләгән эшләре белән танышу, ахырдан исә “Бер - 41ел балалары” әсәре буенча куелган нәфис фильм карау оештырылды. 

Моңа кадәр Мөхәммәт аганы Арчадан чыккан бөек әдип буларак белсәк, әлеге чарада без аны Саба белән бәйле шәхес буларак ачтык, тагын да үз иттек. Әлеге җылы якты очрашу аша тагын бер кат аның әсәрләренең тирән мәгънәсенә, иҗатының олпатлыгына инандык.

Елның көзге вакыты һәрвакыт иҗатка илһамландыра. Бу алтын киемле урман да, парк та, көзге сукмак та. Кояш һәм куе томан, кипкән миләш һәм алтын  яфраклар! 1-10 нчы октябрь көннәрендә Сатыш авылы мәдрәсәсе музеенда “Исәнме көз!” дигән темага фотокүргәзмә оештырылды. Күргәзмәдә катнашу балаларда табигатьнең көзге күренешләре белән кызыксыну, көз матурлыгын тою  аларга  “көз” төсендәге рәсемнәрне ясарга, фантазияләргә, хыял һәм иҗат итәргә илһам бирәчәк.

Һәр ел саен илебез буенча октябрь ае башында Өлкәннәр көне уздырыла. Өлкәннәр көне - күпьеллык хезмәтләре, авыр сынаулары, бай тормыш тәҗрибәсе булган кешеләргә хөрмәт һәм игътибар күрсәтү көне. Шул уңайдан район туган якны өйрәнү музеенда «Туган якны өйрәнү" клубына йөрүчеләргә чәй табыны оештырылды. Очрашу күңелле әңгәмә, хатирәләр белән чәй табыны артында дәвам итте.  Шулай ук очрашу барышында, күптән түгел генә XII Евразия фәнни-төбәк тарихын өйрәнү форумы турында да әңгәмә корылды. Саба туган якны өйрәнү музеенда клуб берләшмәсенә йөрүчеләрнең әлеге форумда катнашып, чыгыш ясаган туган якны өйрәнүче Сафин Илдар Фатхулла улы очрашуда булган күңелле мизгелләр, вакыйгалар, яңалыклар уртаклашты.

27 сентябрь – Бөтендөнья туризм көне буларак билгеләп үтелә. Әлеге көнне тагын да күңелле һәм файдалы итү, туган ягыбызның матур табигате, бай тарихы белән таныштыру максатыннан Саба туган якны өйрәнү хезмәткәрләре «Туган як тарихы һәм истәлекле урыннары» туристик маршруты буенча  экскурсия оештырды.

Якташларыбыз Сабаны бөтенләй башка яктан ачып, күп яңа мәгълүмат туплап, җылы аралашу һәм күңелле ял өчен рәхмәтләрен җиткереп таралыштылар.

Табигатьнең иң гүзәл һәм бай чорында – сентябрьнең өченче якшәмбесендә урманчылар үзләренең һөнәри бәйрәмен билгели. Менә шул уңайдан Саба туган якны өйрәнү музеебызда әлеге һөнәргә багышланган очрашу үткәрелде. Бүген бирегә килгән урманчыларыбыз, Саба урман хуҗалыгы тарихын өйрәнү музее хезмәткәрләре һәм Саба гимназиясенең “Мәктәп урманчылыгы” берләшмәсендә йөрүче 8 сыйныф укучылары чакырылды. Залыбызда исә әлеге өлкәне чагылдырган вакытлы күргәзмә урнаштырдык. Ул Саба урман сәнәгате хуҗалыгының формалашуы һәм ныгуына, Татарстан урман хуҗалыгы үсешенә зур өлеш керткән шәхесләребезгә багышлана. 

Укучылар, килгән кунаклар белән берлектә районыбызда лесхозларны һәм урманчылыкларны оештыру, урманның тоткан роле, файдасы һәм аны саклауда безнең керткән өлешебез турында фикер алыштык.

“Күрше” проекты кысаларында үтүче чаралар безнең Сабабызда да бик матур яңгыраш алды, райондашларыбыз, күршеләребез тарафыннан бик җылы кабул ителде.  Әлеге чараның өченчесен 30 август - Татарстан Республикасы көне, шулай ук безнең Саба районы оешканга 95 ел тулуга да багышларга теләдек. Чөнки Татарстанда бик күп районнар бер-берсенә күрше булып яшәсә, районыбыз халкы исә шулай ук бердәм, дус, телебез һәм милләтебез сакчылары буларак матур яшиләр. Гаилә, милли традицияләрне саклау һәм килер буыннарга тапшыруга зур өлеш кертәләр. Шулай ук әлеге чара анда районыбыз башлыгы Рәис Нургалиевич Миннеханов үзе катнашу белән дә истәлекле.

Кунакларны район мәдәният йортлары каршында эшләүче ансамбльләр, курайчылар, гармунчылар каршы алды. Чараны проект җитәкчесе – Саба туган якны өйрәнү музее хезмәткәре Алисә Гимадиева башлап җибәреп, ул барысын да әлеге проектның максаты һәм бурычлары белән таныштырды. Саба районы тарихы, аның кәсепләре турында мәгълүмат бирде. Параллель рәвештә мастер-класслар да барды, анда балалар Саба урман хуҗалыгы, Саба сувениры тарихы белән таныша, үз куллары белән әлеге савыт-сабаларны буяп, әзер сувенирларны исә истәлеккә алып та китә алдылар.  

Киләсе тукталыш - «Йөзек салыш», «Биш почмак» кебек татар халкыбызның милли уеннары, район мәдәният йорты хореографы катнашында татар халык биюе буенча мастер-класс. Әлеге тукталышның максаты-татар сөйләмен тыңлап кабул итәргә һәм аңларга, аңлаешлы тематика, үзләштерелгән сүзләр чикләрендә татарча сөйләшергә өйрәтү. Балаларның кабул итү, игътибарны, хәтерне үстерү; милли уеннарның төрләре белән таныштырып, телебезгә, мәдәниятебезгә кызыксыну уяту.

Әлеге барлык чаралар исә Балалар сәнгать мәктәбе укучылары, район клублар системасы хезмәткәрләре, районыбыз үзешчәннәре көче белән әзерләнгән концерт номерлары белән үрелеп барды.

Иң кызыклы һәм тәмле тукталыш - саф һавада милли ризыкларыбыз белән чәй эчү. Биредә балалар гына түгел, аларның әти-әниләре һәм бәйрәм кунаклары да милли ризыклардан авыз итә алды. Самовар чәе һәм мичтә пешкән коймаклар - бәйрәмнең матур бизәге һәм җылы, рәхәт урыны иде.

“Күрше” фестивале «Безнең ишегалды» программасының дәвамы һәм ил масштабында моңарчы күрелмәгән проект. Әлеге бәйгегә Татарстан Республикасы Рәисе Рөстәм Миңнеханов старт биргән иде. «Күрше» фестивале – халык арасында күршелек культурасын үстерүгә, Татарстан ишегалларында гаилә һәм күршелек традицияләрен ныгытуга юнәлдерелгән проект.

Шундый чараларның менә инде икенчесе Байлар Сабасының Дальная урамында үткәрелде. Биредә үзмәшгуль, проектның җиңүчесе Алисә Гимадиева тарафыннан, Саба мәдәният бүлеге, Саба үзәкләштерелгән музейлар системасы белән берлектә “Халкымның күңел бизәкләре” дип исемләнгән чара үтте.

Чараның чираттагысы 30 август-Республика көне уңаеннан үткәреләчәк.

Бөтесоюз Үзәк Башкарма Комитетының 1930 елның 10 августындагы карары нигезендә Татарстанда оештырылган 33 район исәбендә Саба районы да төзелә.

Ул Мамадыш һәм Арча кантоннарындагы Саба, Әбде (26 авыл) Теләче (31 авыл) һәм Чүриле (14 авыл) волостьларын эченә алып, 113 авылны, 8 пүчинкәне, 44 колхозны берләштерә.

Саба туган якны өйрәнү музеенда Саба районы оешуга 95 ел тулу уңаеннан  вакытлыча күргәзмә оештырылды. Әлеге күргәзмә белән танышу өчен музейда кунакка көтеп калабыз!

Саба туган якны өйрәнү музеенда клуб берләшмәсенә йөрүчеләрнең  чираттагы утырышы узды. Әлеге очрашуның темасы Ишан Хәзрәт шәхесенә багышланды. Бүгенге көндә Казанчы-Бигеней авылы зиратында киләчәк буын өчен тарихи мирас булып торучы Ишанның гаилә төрбәсе саклана. Ул ислам дине нигезләрен тирәнтен белүче, шулай ук үләннәр белән дә дәвалаучы, могҗиза тудыручы  кеше буларак үзен танытты. Хәзрәтнең  даны тирә-якка бик тиз таралган, авыл халкы да аны хөрмәт  белән искә ала. Очрашу барышында Ишан Хәзрәтнең кабере янында төшерелгән  видеосюжет каралды, әңгәмә оештырылды, катнашучылар тәэсирләре белән уртаклаштылар.

Саба туган якны өйрәнү музеенда клуб берләшмәсенә йөрүчеләрнең  чираттагы утырышы узды. Әлеге очрашуның темасы Ишан Хәзрәт шәхесенә багышланды. Бүгенге көндә Казанчы-Бигеней авылы зиратында киләчәк буын өчен тарихи мирас булып торучы Ишанның гаилә төрбәсе саклана. Ул ислам дине нигезләрен тирәнтен белүче, шулай ук үләннәр белән дә дәвалаучы, могҗиза тудыручы  кеше буларак үзен танытты. Хәзрәтнең  даны тирә-якка бик тиз таралган, авыл халкы да аны хөрмәт  белән искә ала. Очрашу барышында Ишан Хәзрәтнең кабере янында төшерелгән  видеосюжет каралды, әңгәмә оештырылды, катнашучылар тәэсирләре белән уртаклаштылар.